Имконияти чекланган китобхонлар учун махсус лойиҳа ишлаб чиқилди
Алишер Навоий номидаги Ўзбекистон Миллий кутубхонасида Ислом цивилизацияси марказининг илмий-инновацион лойиҳаларини амалга оширишга бағишланган учрашув бўлиб ўтди. Унда марказ фондини мазмунли манбалар билан бойитиш, илмий жамоатчиликка инновацион усулларда хизмат кўрсатиш, аждодлар илмий меросини кенг тарғиб қилишга оид бир қатор таклифлар, жумладан, “Имконияти чекланган китобхонлар учун махсус ресурслар” номли лойиҳа муҳокама қилинди.
Шунингдек, электрон кутубхона учун нодир манбалар фондини шакллантириш, Ўзбекистон тарихи ва буюк аждодлар мероси ҳақидаги халқаро тадқиқотларни жамлашга қаратилган библиография лойиҳалари алоҳида эътиборга олинди. Қолаверса, имконияти чекланган китобхонлар учун аудио китоблар, Луи Брайл ёзувидаги асарлар ва тифлокомментарияли фильмлар тайёрлаш, шунингдек, Регистон майдонининг тактил 3D макетини яратиш лойиҳалари маъқулланди. Бу орқали кўриш имконияти чекланганлар бинони нафақат таърифини эшитади, балки ушлаб кўриб, тўлиқ тасаввурга эга бўлади.
Муҳокамалар давомида ҳар бир лойиҳанинг техник топшириқлари кўриб чиқилди, таклифлар билдирилди ва уларни такомиллаштириш бўйича тавсиялар берилди. Ишчи гуруҳ аъзолари томонидан лойиҳаларнинг амалий қўлланилиши ва кутилаётган натижалари юзасидан фикр алмашилди.
Йиғилиш якунида иштирокчилар томонидан лойиҳаларни сифатли амалга ошириш, муҳокама қилинган масалаларни қисқа муддатларда ҳал этиш ва кутубхона фаолиятини янада такомиллаштириш юзасидан зарурий топшириқлар берилди.
Ислом цивилизацияси маркази Ахборот хизмати